Në seminar morën pjesë rreth 20 imamë shqiptarë, turq e boshnjakë, që një kohë të gjatë jetojnë dhe veprojnë në Zvicër, ndërsa seminari u zhvillua në gjuhën gjermane. Në fillim të pranishmit i përshëndeti drejtori i SZIG-ut z. Hansjörg Schmid dhe më pas vazhdoi programi me ligjëratën e mbajtuar nga zonja, Dr.Nadia Baghdadi.

Në fokus të prezantimeve ishte roli i imamëve dhe pritshmëritë e shoqërisë dhe të komunitetit ku ata veprojnë, pastaj çështja e ndërtimit të xhamive të reja, si dhe diskursi i komunikimit në lidhje me temat e diskutueshme në shoqëri, etj.

Imamët patën mundësinë që të paraqesin edhe idetë dhe mendimet e tyre në lidhje me disa çështje të parashtruar nga organizatori, siç ishte tema e menaxhimit të Pandemisë në agjendën e imamit dhe të xhamisë, si dhe prioritetet e imamit dhe të qendrës islame në të ardhmen, etj.

Pas një pauze të paraditës, në foltore u paraqitën imami nga xhamia Wil, Bekim ef. Alimi, Dominique Tschannanen, i punësuar në entin për migracion në qytetin e Wilit, Ekrem Besir, përfaqësues nga xhamia Aksa në Schaffhausen, si dhe profesori univerzitar, Dr. Andreas Tunger-Zanneti.

Këta folën për përvojat e tyre dhe për hulumtimet në lidhje me “kundërshtimin e ndërtimit të xhamive të reja në Zvicër, si dhe për rolin e tyre që do të duhej ta kishin në përgjithësi në shoqëri.”

Kjo ishte dita e dytë e këtij seminari dhe i fundit për këtë vit. Shpresojmë që në vitin tjetër të organizojmë seminar tjetër me imamët dhe kryesitë e xhamive tona.

(Daigs.ch)